#即時娛樂新聞##香港收視報告# 「TVB(@TVB官方微博 )慘淡一周 《拳王》有力同《刑偵日記》爭年度包尾?」
TVB公布上周(11月29-12月5日)三間電視台直播收視數據,先睇大台表現……咦!唔多靚喎。
2套正在播映嘅台慶劇《十月初五的月光》以及《拳王》論收視完全冇台慶劇勢頭。《十》第2周有19.3點,同前周差唔多,台慶劇都冇20點真係要打手板。《拳王》直情更差,跌至16.1點,如果之後十五集未有起色,好有機會同《智能愛人》爭年度尾二(全劇平均17.4點)……但係同全劇平均13.7點嘅《刑偵日記》比,都仲有好多優勢!
另外2套一至五十點半綜藝節目《麻雀鬥室三決一》及《讀心專家》都唔夠12點,比前周跌2點,絕對響起警號。就連星期日稍有起色嘅《思家大戰》都由前一集19.4點打回原形去返16.8點。唯一可喜係以《聲夢》學員擔正嘅《青春本我》,星期日首播錄得16.8點,尚算收貨。且看被盛讚係港版High School Musical嘅口碑幫唔幫到手。

TVB跌收視,Viu反而守得住。《全民造星4》被觀眾鬧爆foul錯人,演出亦唔夠上季好睇,但收視依然keep到,上周甚至微升至5.7點。假如Viu慣性收視係3點,咁《造星》應該係5點起錶。另外2套綜藝Have a Sweet Gym 及《歌手.門》收視都近乎不變。
11月22-28日︳台慶劇繼續強差人意 《拳王》開局排全年尾二 《十月初五的月光》都係唔夠20點
上周三台收視焦點落喺TVB2套壓軸台慶劇《拳王》以及《十月初五的月光》嘅開播收視之上。睇新劇成績前,先睇《星空下的仁醫》大結局表現︰《星》上周一播出最後一集,終於衝破20點收視,收22點。以台慶劇+雙視帝+鍾嘉欣回歸之作嘅牌頭,竟然比唔上小品劇《寶寶大過天》、網上一早播完嘅《愛美麗狂想曲》,的確失禮。

咁新劇又如何?翻拍經典嘅《十月初五的月光》首周有19.4點,表現不過不失,但已經係四套台慶劇之中開局表現最好。以新演員擔正,加上缺乏澳門取景呢個元素,即使唔過20點都算係咁,但要維持落去有難度。
至於有爆肌@張振朗Owen@黎耀祥Wayne 嘅《拳王》就相對失色,頭4集只有16.5點。今年中TVB公布直播收視以來,呢個首周收視排全年尾二,只係比奧運期間出街嘅《智能愛人》(12.3點)好,頂多都係贏埋只有7集嘅《欺詐劇團》。上一套《拳王》收視出眾,且看新一套後勁如何喇。
Viu今期梗係睇《全民造星4》收視啦,上周依然有5.5點,同前幾周差唔多,未有受首圈foul走大熱選手嘅負評影響,相信《造星4》已經建立到5點左右嘅穩定收視。上周有MIRROR成員Anson Kong節目 Have a Sweet Gym 接檔Anson Lo《神的女主角》,首周有3.4點,比《神》結局周跌0.5點。而11點嘅時段新節目《歌手.門》只有2.3點,莫非電視台音樂節目真係冇咩觀眾捧場?
11月15-21日︳TVB台慶24.7點交到貨 @李思捷JohnsonLee 竟然係今期收視保證

上周收視焦點又落返TVB身上,台慶嘛!
#萬千星輝賀台慶# 》錄得平均24.7點收視,算係近年新高,節目本身冇咩特別綽頭都有呢個數,#曾志偉# ( @曾志偉獎門人 ) 總經理可以過關了。據知當晚最高收視時段係李思捷主持嗰part,而李主持嘅星期日遊戲節目《思家大戰》,最新一集直播收視有19.4點!當日搵#李思捷# 做主持,普遍都係負評,但係《思》出街之後,收視一路keep到15、16點左右,最近更出現升勢,李一改以往主持風格,似乎觀眾幾受。

2套台慶劇又表現如何?《換命真相》終於衝過20點,一至五有20.7點,星期日播大結局更有22.2點,不過全劇平均收視依然唔過20點,完全冇過去「台慶劇=收視好」嘅氣勢。另一套劇《星空下的仁醫》就更慘,上周收視上升但剛好得19.9點,依然唔過20!拉勻平均收視計,《星》好大機會唔過20點,應該只能喺全年劇集收視排名較後位置出現。

講完大台就輪到Viu。《全民造星4》微跌但依然有5.3點,今周開始淘汰賽理應更刺激,但係復活人選爭議太大,可能有觀眾選擇放棄,下個禮拜收視報告可以睇到係咪咁大影響。而以Anson Lo#盧瀚霆# 做招徠嘅《神的女主角》最後一周稍跌至3.9點,今周接力會有另一鏡仔Anson Kong江爗生主持嘅Have a sweet Gym,收視成績算係MIRROR兩位Anson嘅人氣小比併。
11月8-14日︳TVB 2套台慶劇仲未破20點 《全民造星4》不跌反升

上周(11月8-14日)收視報告又嚟啦!先睇TVB,2套台慶劇《星空下的仁醫》同《換命真相》接近結局周,依然未能突破20點收視,《換》比上周升近1點,但仍然只有19.9點;《星》就更慘,未能食住前周升勢,上周反而回落到19.3點。到底2套之中,邊套最終可以破2?而下一檔嘅《十月初五的月光》同《拳王》,會唔會更慘淡?

Viu方面,向來《全民造星》嘅第一回合比賽都係考驗各方嘅環節︰近百個參賽者逐個出場,形式又類似,好考觀眾耐性︰錄影由下晝3點去到第二日朝早9點,幕後、評判、參加者同導師齊齊冇得瞓。《全民造星4》第一周有5.3點,本來預計上周會跌,但係居然反地心吸力微升0.2點至5.5點。隨住更多話題選手出現,第3周收視估計有望保持。
上次收視報告講起,另外2套綜藝《神的女主角》同《香港祕密搜查官》收視有驚喜,結果上周出現微跌,各自流失近半個收視點。《神》有4.3點而《香》就有2.9點,後者算係僅僅合格。
下次收視報告,焦點梗係睇《星空下的仁醫》同《換命真相》結局周成績如何,同埋《全民造星4》最後一周個人對決,會唔會趕客呢?
11月1-7日︳《全民造星4》收視好 《星空下的仁醫》靠口碑反超前 兩台大戰冇輸家?
上周三台直播收視報告出爐!今次重點梗係睇ViuTV以《全民造星4》、《神的女主角》及《香港祕密搜查官》三套綜藝節目,為TVB台慶月「贈興」嘅成效啦。
結果都幾出人意表,《全民造星4》首周收視5.3點,以Viu平均嘅3點慣性收視計,算係相當突出,對比前一周嘅《賭命夫妻》更加係升咗6成半。《造星4》收視好都幾合符賽果,亦因此帶動以Anson Lo(盧瀚霆)做主導嘅《神的女主角》有4.7點,一洗前一檔《台灣乜都拜》嘅頹勢。而以《ERROR自肥企劃》班底「無制限OT編集團」創作嘅《香港祕密搜查官》都有3.5點收視,令上周Viu一至五黃金時段整體成績唔錯。

奇就奇在TVB並無因此出現收視下跌,對正《造星4》嘅《星空下的仁醫》上周升至19.4點,超越另一套卡士無咁強勁嘅台慶劇《換命真相》(19點),可以話係受傳媒口碑推介所帶動,估計加埋7天跨平台收視,升幅會更明顯。而首周播出嘅10點半節目《男神廚房》有14.7點,比之前同時段2套旅遊節目更好,證明「限廚令」嘅無謂。而《醫醫,我不想再病了》同之後嘅帶貨節目都冇受影響,即係話多咗人睇電視,和氣收場。
不過《全民造星》系列向來都有個致命傷︰第一回合比賽有九十幾個參加者,雖然今年節目嘗試加快節奏,以1對1比賽增加可觀性,但係呢個階段快極都要播2-3個禮拜,未來2周收視能唔能夠keep住個勢?
10月25-31日︳TVB台慶劇微升 《東張》播曱甴老鼠橫行收視反升

上周(10月25-31日)嘅三台收視報告,真係平淡到難以落筆。
TVB踏入台慶月,今個星期Viu正式出招「贈慶」,晚上9點半起先有王牌《全民造星IV》,10點半有教主Anson Lo(盧瀚霆)有份嘅真人show《神的女主角》,連11點都出動《ERROR自肥企劃》嘅「格仔Mike」作品《香港祕密搜查官》。咁意味住上星期嘅全線綜藝都步入結尾,但唔代表收視有升勢。《台灣乜都拜》同《蟲前有10個女仔》本身口碑麻麻,網上亦唔見好多人討論,上周收2.7同2.5點,都可謂跌穿Viu3點嘅慣性收視。稍為有noise嘅《賭命夫妻》保持水平收3.2點,而全周其他節目收視都欠缺亮點。

TVB方面,2套台慶劇首周收視失利。雖然傳媒都普遍大讚《換命真相》同《星空下的仁醫》有水準,但質素高唔代表觀眾buy,廣告商係睇「數」而唔係睇「素」。直播收視方面兩劇依然未過20點,《換》有19.2點微升0.1點,《星》有18.9點升幅較大,到底口碑能否帶動收視,就要睇官方公布嘅「跨平台收視」數字。

上周《東張西望》連播多宗食物及衛生相關報導,曱甴老鼠橫行鏡頭貫穿觀眾開飯時間,但係《東張》收視不跌反升,有20.7點。雖然升幅唔夠一點,但可能為製作組搵到出路︰觀眾唔怕重口味,仲好好送飯!
10月18-24日︳台慶劇失利《星空下的仁醫》《換命真相》首周唔過20點
上星期(10月18-24日)三間電視台收視報告公布,重點一定係TVB 2套台慶劇《星空下的仁醫》同《換命真相》首周成績如何,結果……唔OK喎!
@馬國明-Kenneth@鄭嘉穎KC@Linda鍾嘉欣 等主演嘅《星空下的仁醫》,本來被寄予厚望,點知頭5集直播收視只有18.5點,比起今年較早前播出、收視平平嘅《一笑渡凡間》(19.2點)更不濟。

同樣係台慶劇,被睇低半線嘅《換命真相》首周有19.1點,稍勝主角陣容更強嘅《星空下的仁醫》。2套台慶劇嘅直播收視數字可以話係唔收貨,除非劇集有口碑帶動觀眾翻煲,否則難以有大幅增長。舉個例,前一檔嘅《我家無難事》首周收約19點,結局周有8號風球「加持」升至22點,由此可見要2套劇收復失地大幅反彈有幾難,或者靠「七天跨平台收視」數字美化一下都得嘅。

TVB其他節目亦未見有突出表現,新節目《冰島潮什麼》(一至三10點半)守住13點左右;前2周都有颱風帶挈收視嘅《#東張西望# 》同《#愛.回家之開心速遞# 》,上周打回原形,跌至之前的20/21點水平。
Viu嘅收視都唔見得幾好,前周異軍突起嘅《台灣乜都拜》收2.8點,跌幅有2成半;接力《宵夜燒到過埋夜》嘅《蟲前有10個女仔》更加食唔住前者個勢,得2.5點,比《宵》最後一周流失4成觀眾,似乎要靠11月開播嘅《全民造星4》先有望翻身。而Viu全周收視之冠就係重播掀起換飛潮嘅《拉闊音樂會 風火雷電》,有4.1點。
10月11-17日︳打風再帶挈TVB收視 《我家無難事》結局彈升
上次嘅收視報告提到,前周嘅星期六晚掛8號風球,令TVB當晚收視有所進帳。上星期二又係掛8號波,收視又有冇正面影響?
TVB公布嘅直播收視報告提到,上星期二嘅《東張西望》同《愛.回家之開心速遞》都因為打風而取得高收視,《東》收27.8點而《愛》就有26.6點,亦都帶動周一至五平均收視升1-2點。

另一焦點係黃金時段劇集《我家無難事》同《把關者們》結局周成績。2套劇開播後收視疲弱,但係後半段開始穩步上揚,最終《我》最後5集收22點,以全年劇集成績計算不過不失;而《把》一至五收19.5點,星期六大結局收18.5,始終無力突破20點…….
(yahoo娛樂圈) http://t.cn/R2WxksT http://t.cn/R2WxksT

更多娛樂新聞動態

全站最新消息

d